ឆក់កាបួបលុយនារីម្នាក់ កំពុងជិះម៉ូតូតាមដងផ្លូវមិនបានសម្រេចត្រូវនគរបាលចាប់ខ្លួន
19-March-2020 | ដោយ ពលមនសិការ
កណ្ដាល៖ ជនសង្ស័យ២នាក់ ជិះម៉ូតូឌុបគ្នាឃើញនារីម្នាក់កាន់កាបូបលុយនៅជាប់នឹងដៃ ក៏ធ្វើសកម្មភាពឆក់កាបួបពីដៃនារីរងគ្រោះ រួចព្យាយាមបើករត់គេចខ្លួន តែពុំបានសម្រេច ជនសង្ស័យទាំង២នាក់នេះ បានបើកម៉ូតូបុកគូថរថយន្ដ បណ្ដាលឲ្យដួលត្រូវប្រជាពលរដ្ឋជិតខាងធ្វើការចាប់ខ្លួន រួចប្រគល់ឲ្យសមត្ថកិច្ចក្រុងតាខ្មៅចាត់ការតែម្ដង។ ករណីនេះ បានកើតឡើងកាលពីវេលាម៉ោង១៦និង៣០នាទី ថ្ងៃទី១៨ ខែមីនា ឆ្នាំ២០២០ ត្រង់ចំណុចផ្លូវលេខ២០៦ ស្ថិតក្នុងភូមិដើមមៀន១ សង្កាត់ដើមមៀន ក្រុងតាខ្មៅ ខេត្តកណ្តាល។
មន្ដ្រីនគរបាលក្រុងតាខ្មៅបានឲ្យដឹងថា ជនសង្ស័យមានគ្នា២នាក់ ទី១-ឈ្មោះ នឹង សុខា ភេទប្រុស អាយុ១៧ឆ្នាំ មានទីលំនៅភូមិព្រែកតាគង់ សង្កាត់ចាក់អង្រែលើ ខណ្ឌមានជ័យរាជធានីភ្នំពេញ ទី២-ឈ្មោះ ណុល ចិត្រា ភេទប្រុស អាយុ២៥ឆ្នាំ មានទីលំនៅភូមិកោះនរា សង្កាត់និរោធ ខណ្ឌច្បារអំពៅ រាជធានីភ្នំពេញ។ ចំណែកនារីរងគ្រោះឈ្មោះ លីម ម៉ីស៊ាំង អាយុ២១ឆ្នាំ មានទីលំនៅភូមិសង្កាត់កើតហេតុ ។
វត្ថុតាងដកហូតបានមាន៖ ម៉ូតូ១គ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ ភ្នំពេញ ១GU-៥៦៥០(របស់ជនសង្ស័យ) ,កាបូបដៃ ពណ៌ទឹកប្រាក់ចំនួន១(របស់ជនរងគ្រោះ) ,លុយខ្មែរចំនួន២៩០០រៀល និងទូរសព្ទ័ដៃ២គ្រឿងរបស់ជនសង្ស័យ។
ប្រភពដដែលបន្ដថា កាលពីពេលវេលាកើតហេតុខាងលើ ខណៈជនរងគ្រោះកំពុងជិះម៉ូតូតែម្នាក់ឯង តាមផ្លូវហើយកាន់កាបូបលុយនៅជាប់នឹងដៃ ភ្លាមនោះ ក៏ឃើញជនសង្ស័យ២នាក់ជិះម៉ូតូ១មួយគ្រឿង ដោយឈ្មោះ នឹង សុខា ជាអ្នកឌុប ចំណែកឈ្មោះ ណុល ចិត្រា អង្គុយខាងក្រោយ ហើយបានធ្វើសកម្មភាពឆក់កាបូបពីដៃជនរងគ្រោះ រួចព្យាយាមបើកម៉ូតូរត់គេចខ្លួនឆ្ពោះទៅរាជធានីភ្នំពេញ តែនៅពេលបើកដល់ចំណុចមុខរោងចក្រតាក់ហ្វាត សង្កាត់ចាក់អង្រែលើ ខណ្ឌមានជ័យ ម៉ូតូជនសង្ស័យបានបើកបុកគូទរថយន្តគេ បណ្តាលឲ្យដួល ហើយត្រូវប្រជាពលរដ្ឋ និងសមត្ថកិច្ចប៉ុស្តិ៍ចាក់អង្រែលើចាប់ឃាត់ខ្លួនបានទាំង២នាក់ និងវត្ថុតាងពាក់ព័ន្ធ យកមកប្រគល់ឲ្យសមត្ថកិច្ចនគរបាលក្រុងតាខ្មៅចាត់ការតាមនិតិវិធីតែម្តង។
តាមចម្លើយសារភាពជនសង្ស័យ២នាក់ខាងលើបានប្រាប់ថា ពួកគេពិតជាបានធ្វើសកម្មភាពឆក់កាបូបលុយរបស់ជនរងគ្រោះខាងលើប្រាកដមែន ៕
ចំនួនអ្នកទស្សនា
- ថ្ងៃនេះ5871
- ម្សិលមិញ15191
- សប្តាហ៍នេះ49021
- ខែនេះ70901
- ឆ្នាំនេះ70901
- សរុប20513357